1 Raja-raja 10

Iatonna rangimi datu baine dio mai Syeba tu kareba diona Salomo tu siumpu’ sanganna PUANG saemi la umpeponto bannangi.

Saemi dio Yerusalem naturu’ baanan makamban sia ba’tu pira-pira unta unteke’ pebangki’ sia bulaan lendu’ budanna sia ma’rupa-rupa parimata ballo. Rampomi lako Salomo, anna pokadai lako tu mintu’ apa lan penaanna.

Nabattuanannimi Salomo lako tu mintu’ pekutananna; moi misa’ tae’ tu tang nakita datu tu tang nabattuananni lako.

Iatonna tiromi datu baine dio mai Syeba tu mintu kamatarrusanna Salomo sia iatu banua mangka napabendan,

sia mintu’ kande dao medana, sia kao’koranna to mase’ponna sia bendanna mintu’ to ma’kamayana sia pakeanna tau iato mai, sia mintu’ apa nairu’ sia pemala’ ditunu pu’pu’na tu biasa napennoloan lan banuanNa PUANG, pa’de deatami tu datu baine iato.

Nakuami lako datu: Tongannamo tu apa kurangi dio tondokku tu diona a’gammi sia kakinaammi.

Apa tae’ kupatonganni tu kada iato, tonna tae’pa kusae sia matangku kalenamo untiroi, tonganna sangsesenapa tu tae’ napokadanna’ tau, belanna la’bipa tu kakinaammi sia kamanamanammi na iatu kareba kurangi.

Maupa’ tu mintu’ taummi sia maupa’ mintu’ to mase’ponmi tu tontong bendan dio olomi umperangii tu kakinaammi!

Mintu’na kadipudian lu langngan nasang PUANG, Kapenombammi, tu umpopaimankomi, naurunganni umpannisungkomi dao isungan kapayunganna Israel! Belanna tontong sae lakona Nakamasei PUANG, tu to Israel, iamoto anNa angka’komi dadi datu la umpogau’ katonganan sia kamaloloan.

Nabenmi bulaan tu datu Salomo saratu’ duangpulo talenta sia lendu’ budanna pebangki’ sia ma’rupa-rupa parimata ballo: iatu pebangki’ napa’bengan datu baine Syeba lako datu Salomo, tae’mo padanna totu nabaa tau.

Sia iatu mintu’ lembangna Hiram tu umbaa bulaan dio mai Ofir, umbaa duka tarru’ buda kayu almuggin sia ma’rupa-rupa parimata ballo dio mai Ofir.

Iatu kayu almuggin iato nagaraga datu oongan lan banuanNa PUANG sia lan banuanna datu, sia nagaragai katapi sia dandi napake to massengo. Iatu kayu almuggin susito tae’ lenpa nabaai ba’tu natiroi tau sae lako totemo.

Nabenmi datu Salomo tu mintu’ apa naporai sia napalaku datu baine Syeba, senga’ iatu mintu’ apa nabenni datu Salomo sitinaya kasugiranna. Mangkato sulemi sola mintu’ to mase’ponna lako tondokna.

Iatu timbanganna mintu’ bulaan dipataman Salomo lan sangtaun, annan ratu’ nnannan pulona nnannan talenta bulaan.

Boko’ ia tu apa napatama to ma’balili kapua sia iatu sima napatama to ba’balu’-balu’ sia mintu’ sima napatama datu to Arab sia to maraa lan mintu’ tondok.

Nagaragami datu Salomo tu balulang kapua duaratu’, bulaan dikalubabak digargai; annan ratu’ batu bulaan natimbanganni, ke misa’oi balulang kapua;

sia tallu ratu’ balulang bitti’, bulaan dikalubabak digargai; tallu mina bulaan natimbanganni, ke misa’oi ballulang bitti’. Napalanmi datu lan banua: Pangala’ Libanon.

Sia nagaragapa datu tu misa’ isungan gading kapayungan kapua, anna sapu’ bulaan massang.

Iatu isungan kapayungan iato, annan lau’na tu eranna sia malepong tu daona lu sissareanna, sia dio sa’dena patomali tu isungan den sissareanna, sia den singa da’dua bendan dio sa’de sissarean iato,

na sangpulo dua singa bendan dio sa’dena patomali dao to’ eran annan lau’na; iatu apa susito tae’ lenpa nagaragai tau moi lan misa’ duka kadatuan.

Iatu mintu’ irusanna datu Salomo bulaan nasang, sia mintu’ pareanan lan banua: Pangala’ Libanon, bulaan massang; moi misa’ tae’ bang salaka digaraga, belanna iatonna linona Salomo tae’ naangga’i tau tu salaka.

Belanna den lembangna datu lan tasik tu ma’palu lako Tarsis sola lembangna Hiram sipissan lan tallung taun namaneo tama tu lembang dio mai Tarsis umbaa bulaan sia salaka sia gading sia seba sia merak.

Susimoto tu datu Salomo la’bi kapua anna iatu mintu’ datu dao kuli’na padang la dona kasugiran la diona kakinaan.

Mintu’ issinna lino morai tongan la umpessitiroi Salomo la umperangii kakinaanna, tu mangka Natanan Puang Matua lan penaanna.

Pantan umbaami pamenganna, iamotu oongan salaka sia bulaan, pakean, pa’buno, pebangki’, darang sia bagala’, ke taunnoi.

Pissanmito narampun Salomo tu ba’tu pira-pira kareta sia pakkanarang, naurunganni naampui tu kareta sangsa’bu a’pa’ ratu’ na pakkanarang sangpulo dua sa’bunna, anna palaanni lu mintu’ kota dipannii kareta sia sola datu dio Yerusalem.

Sia naposara’ datu anna iatu salaka dio Yerusalem tarru’ buda susi batu-batu sia iatu kayu arasi’ sangtinti kayu ara pangala’, tu buda tuo dio padang Merrantena.

Iatu dinii umpasaean darang Salomo lu dio mai Misraim sia dio mai Kewe; iatu to ma’balilinna datu unnalai tu darang iato mai dio mai Kewe susitu allian pasa’.

Iatu misa’ kareta dio mai Meisraim, ke saei dibaluk dilampak tu allinna annan ratu’ sikele’, anna misa’ darang saratu’ limangpulo sikele’; sia nabalili dukato ma’balilinna Salomo pira lako mintu’ datu to Het sia datu to Aram.